வெள்ளி, 9 டிசம்பர், 2022

                                                     குறுங்கவிதைகள்

 

                                 *  ஏழை என்றும் 

                                   சிரிப்பதாயில்லை 

                                    எப்படி தலைவா 

                                   இறைவனைக் காண்பது?


                                  *எல்லா நாளையும் விட 

                                    இன்று அம்மாவுக்கு 

                                  ஏகப்பட்ட வேலை 

                                   அன்னையர் தினம்.


                                   *தெய்வம் நின்று கொல்லுமாம் 

                                       நின்றும் கொல்லவில்லை

                                     படுத்தும் கொல்லவில்லை

                                      சிரித்தபடி பாவிகள்.


                                     *விதியே என்று 

                                       கல்லாய்க் கிடக்க

                                       எல்லாப் பெண்டிரும் 

                                       அகலிகைகள் அல்லர்.

                                      *குனிந்தால் 

                                        குதிரை ஏறுவார்கள் 

                                         நிமிர்ந்தே நில்.


                                      *கோடு தாண்ட 

                                       சீதைக்கு ஆனது 

                                        ஒரு நொடி 

                                        அதனால் நிகழ்ந்த 

                                        போர் முடிய 

                                         பதினெட்டு மாதம்.


                                          *பற.

                                             முடியாவிட்டால்

                                             ஓடு. 

                                             இயலாவிட்டால் 

                                              நட.

                                              படுத்துவிடாதே.


                                            *நடை மாறலாம் 

                                              உடை மாறலாம் 

                                               தடம் மாறக்கூடாது.


                                            *அடங்குதல்  அடிமைத்தனம் 

                                               நடுங்குதல் பேடித்தனம் 

                                             முடங்குதல் மூடத்தனம் 

                                               முயற்சி மட்டுமே மூலதனம்.


                                              *சூரியன் மீது 

                                                 கல் வீசாதீர்கள்.

                                                  கை தான் உடையும்.


                                                 *வரப்பு இல்லாவிட்டால் 

                                                  அது பாத்தியில்லை 

                                                   எல்லைகள் இல்லாவிட்டால் 

                                                   அது தேசமில்லை 

                                                    வேலி இல்லாவிட்டால் 

                                                   அது விளைநிலமில்லை 

                                                   ஒழுக்கம் இல்லாவிட்டால் 

                                                    அது வாழ்க்கையில்லை.

                                               


                                            

      

                                            

                                             

                        

                                       


                                  


ஞாயிறு, 4 டிசம்பர், 2022

                                   எது வளர்ச்சி ?


என்ன உலகம் என்ன மனிதர் ஒண்ணும் புரியலே 

என்று மறையும் ஏற்றத் தாழ்வு நமக்கு இடையிலே?

ஒரு பக்கம் பணக்காரன் பூசணி போல் பருக்குறான்!

மறு பக்கம் பாமரனோ கடுகாகச் சிறுக்குறான்

வலுத்தவனோ பொதுச்சொத்தை பட்டாபோட்டு விக்கிறான் 

இளிச்சவாயன் நெத்தியிலே பட்டைநாமம் தீட்டுறான்



 

மாடிவீடு கட்டியவன் கட்டாந்தரையில் தூங்குறான் 

மானங்காக்க நெய்தவனோ அம்மணமாய்த் திரிகிறான் 

ஓடி ஓடி உழைத்துங்கூட ஒருரூபா மிஞ்சல

ஒண்டக்கூட ஒரு குடிசை பூமியிலே வாய்க்கலே

பாடுபடும் ஏழைமக்கள் பசித்தீயில் வேகிறார் 

ஆடுமாடு போல் அலைந்து நாதியின்றி சாகிறார் 

விளைநிலங்கள் முச்சூடும் அடுக்ககங்கள் ஆயாச்சு 

விவசாயத் தோழரெல்லாம் வீதியோரம் வந்தாச்சு 

உழவுத் தொழில்  விழுந்து போனா சோறு கிடைக்குமா?

உயரமான மாளிகைகள் பசியைத் தீர்க்குமா?

காசுப் பற்று பெருகியதால் தேசப்பற்று குலைந்தது.

நாசமாகி மனித நேயம் குற்றுயிராய்த் துடிக்குது.

அம்பானி மட்டுமிங்கே வளர்ந்தால் போதுமா?

அய்யாசாமி அப்பாசாமி உயர வேண்டாமா?

தலை மட்டும் வீங்குவது வளர்ச்சி ஆகுமா?

தாங்கும் காலும் இணையாக வளர்ந்திட வேண்டும்

ஒட்டுமொத்த தேசமுமே செழித்திட வேண்டும்!

ஒன்றிணைந்து நலமாக உயர்ந்திட வேண்டும்!

 




சனி, 3 டிசம்பர், 2022

                  உயிரில் உயிராய்


அம்மா நீஎனக்கு அரிய உயிர் கொடுத்தாய் !

அன்னமும்  பாலும் அன்போடு ஊட்டினாய்!

கைப்பிடித்து என்னை நடக்க வைத்தாய்!

கால் வலித்த பொழுது பிடித்து விட்டாய்!

அறியாப் பொருள்களை அறியச் செய்தாய்!

அலுக்காமல் எனது அய்யங்கள் போக்கினாய்!

தீயது நல்லது தெளிந்திடப் பழக்கினாய்!

நோய் எனக்கென்றதும் துடித்துப் போனாய்!

நல்லன செய்ய பயிற்சி அளித்தாய்!

நாவைக் காக்கும் வழிவகை சொன்னாய்!

நேசிப்பதற்குக் கற்றுக் கொடுத்தாய்!

அன்புத் தந்தையை அறிமுகப் படுத்தினாய்!

அவரை மதிக்க அறிவுரை பகன்றாய்!

வயதுக்கு வந்ததும் வரனைத் தேடினாய்!

வாழ்க்கையைச் சீராய் அமைத்துக் கொடுத்தாய்!

பேரக் குழந்தைளை அன்புடன் வளர்த்தாய்!

இத்தனை செய்தஎன் அன்புத் தெய்வமே!

உனக்கென்ன செய்தேன் இடைஞ்சல் தவிர?

எத்தனை பிறவி எடுத்து வந்தாலும் 

உத்தமி உனக்கே மகளாய்ப் பிறப்பேன்!

நித்தமும் உன்னை நினைத்து மகிழ்வேன்!

நெஞ்சில் உன்னை உச்சியில் வைப்பேன்!

உறவால் உன்னுடன் பிணைந்து கொள்வேன்!

உன் உயிரில் உயிராய் கரைந்து போவேன்! 


             அழ(ழு)கிய உலகம் 

   ஓட   ஓடத்     துரத்தும் உலகம்;

திரும்பி எதிர்த்தால் பிடிக்கும் ஓட்டம்.

முகத்துக்கு எதிரே புகழ்ந்து தள்ளும்;

முதுகுக்குப் பின்னே புறணி பேசும்.


பணத்துக்கு முன்னே பல்லைக் காட்டும் ;

ஏழையைக் கண்டால் எள்ளி நகைக்கும்;

எலும்பை வீசினால் கௌவிப் பிடிக்கும்;

எத்தனை இகழினும் மரமாய் நிற்கும்.


இளைத்தவன் காலை வாரிச் சாய்க்கும்;

வலுத்தவன் மகிழ சாமரம் வீசும்;

அடிக்கடி நிறத்தை மாற்றிக் கொள்ளும்;

ஆயிரம் ஆயிரம் வேசங்கள் போடும்.


தேர்தல் வந்தால் எம்பிக் குதிக்கும்;

தேரை இழுக்க முந்தி விரையும்;

தன்னலம் ஒன்றையே உயிராய் மதிக்கும்;

தர்மம் தோற்றிட சூதுகள் செய்யும்.


நீதியின் கரங்களை காசால் முடக்கும்;

சாதிகள் வளர்க்க சங்கங்கள் கூட்டும்;

அடுத்தவன் சொத்தைப் பறித்திடத் துடிக்கும்;

கெடுக்கும் வழிகளை கணக்காய்த் தீட்டும்.


பொய்யை அழகாய் மெய்போல் சொல்லும்;

போலியை அசலென உரக்கப் புளுகும்.;

இதுதான் நமது அழகிய உலகம்;

அழகிய உலகமா? அழுகிய உலகமா?